Putin büdcəni təsdiqlədi - Rusiya məmurları MƏYUS OLDU

Rusiya prezidenti Vladimir Putin deputat və senatorların köməkçiləri, hakimlər, prokurorlar və müstəntiqlər də daxil olmaqla, dövlət qulluqçularının 2025-ci il yanvarın 1-dək maaş artımı ala bilməyəcəyi qanunu imzalayıb.

Qarabaqinfo.az Rusiya KİV-nə istinadən xəbər verir ki, bu qərar hərbçilərə və hüquq-mühafizə orqanlarının əməkdaşlarına təsir etməyəcək.

Rusiya hökuməti 2024-cü ildə maaşların indekssizləşdirilməsini təklif edib və Dövlət Duması tərəfindən birinci oxunuşda təsdiqlənən qanun layihəsinin ilkin variantında bütün kateqoriyaların, o cümlədən hərbçilərin də maaşlarının dondurulması nəzərdə tutulurdu.

O da məlum olub ki, noyabrın 28-də Putin federal büdcəni təsdiqləyib. Büdcə qanununa əsasən 2024-cü ildə müdafiə və təhlükəsizlik sahəsinə rekord məbləğdə - 14,1 trilyon rubl ayrılacaq.

Bu o deməkdir ki, ölkənin 36,66 trilyon rubla bərabər olan ümumi büdcəsinin demək olar ki, 40%-i güc strukturlarının maliyyələşdirilməsinə gedəcək.