“Rusiya Qarabağdakı hərbi mövcudluğunu iqtisadi ekspansiya ilə qoşalaşdırmağa ehtiyac duyur...” – Erməni ekspert

 

"İşsizlik, ağır sosial şərtlər, müharibədən sonrakı stresli vəziyyət və gələcəyə sarsılmış inam çox yaxın gələcəkdə respublikanın(söhbət Qarabağdakı separatçı rejimdən gedir-S.L.) əhalisini azaldıb Qarabağ problemini avtomatik olaraq Azərbaycanın xeyrinə həll edə bilər”.

 

Qarabaginfo.az xəbər verir ki, qondarma separatçı-terrorçu rejimin  mövcud acınacaqlı durumu haqda bu fikri erməni ekspert Boqdan Atanesyan  qəsbkar Ermənistanın “Qolos Armeniyi” nəşrindəki “Qarabağ və  Azərbaycanda yeni iqtisadi reallıqlar” başlıqlı məqaləsində ifadə edib 

 

“...Xankəndində(erməni müəllif “Stepanakertdə” yazır-S.L.) demək olar ki, qızğın bir sürətlə normal yaşayış şəraitini bərpa etmək və iqtisadiyyatı yeni gerçəkliklərə uyğunlaşdırmaq üçün işlər aparılır. Və bu işlər Moskvanın  ən yaxın mənada birbaşa iştirakı ilə həyata keçirilir. Baxmayaraq ki, Rusiya belə bir gündəmdən uzaq olduğunu nümayiş etdirir. Həqiqətən Qarabağın iqtisadi tənəzzülü və erməni əhalisinin kütləvi şəkildə köçməsi halında Rusiya Federasiyası bölgədəki hərbi mövcudluğunun legitimliyini itirəcəkdir. Qeyd edək ki, Qarabağdakı(erməni müəllif “Artsax” yazır – S.L.)  sülhməramlı kontingent özlüyündə Xankəndi üçün artıq müsbət rol oynayan Rusiya pulunun Qarabağ iqtisadiyyatına yeridilməsi üçün kifayət qədər ciddi bir kanaldır. Vaxt keçdikcə bu, Bakının necə yanaşmasından asılı olmayaraq, Rusiya tərəfindən Qarabağ iqtisadiyyatına birbaşa investisiyalara yol aça bilər.

 

Təbii ki, investisiyaların məqsədi və faydaları maliyyə və maddi aspektlərdən daha çox siyasi olacaqdır. Çünki Rusiya təcili olaraq Qarabağdakı hərbi mövcudluğunu iqtisadi ekspansiya ilə qoşalaşdırmağa ehtiyac duyur ki, bu da ondan əlçatmaz xərclər tələb etməyəcəkdir” –deyə erməni ekspert vurğulayır.

 

Moderator.az