Pentaqon: ABŞ NATO-nu asılılıq yox, tərəfdaşlıq üzərində qurmaq istəyir
12-02-2026, 20:38. Yazar: Admin
ABŞ-ın müharibə nazirinin müavini Elbric Kolbi Avropa ilə ABŞ arasında Şimali Atlantika Alyansı çərçivəsində əməkdaşlığın yeni mərhələyə keçməli olduğunu bildirib.
Qarabaginfo.az xəbər verir ki, Kolbi bu fikirləri NATO-nun Baş Qərargahında keçirilən alyansın müdafiə nazirlərinin iclasından əvvəl jurnalistlərə açıqlamasında səsləndirib.
Onun sözlərinə görə, Avropa və ABŞ-ın NATO çərçivəsində birgə fəaliyyəti asılılıq prinsipi deyil, bərabərhüquqlu tərəfdaşlıq əsasında qurulmalıdır və bu, yeni “NATO 3.0” versiyasının formalaşmasına gətirib çıxarmalıdır.
Kolbi qeyd edib ki, 2025-ci ildə ABŞ Prezidenti və NATO-nun Baş katibinin liderliyi ilə alyans daxilində yenidən qiymətləndirmə aparılıb, Avropanın NATO-nun ənənəvi müdafiəsinə rəhbərlik etməsi ideyasına real və səmimi bağlılıq yaranıb.
Pentaqon rəhbərinin müavini əlavə edib ki, NATO-nun tərəfdaşlıq üzərində qurulmuş “NATO 3.0” modelinə keçidi təşkilatın ilkin məqsədinə qayıdışı ifadə edəcək.
“Həqiqətən möhkəm tərəfdaşlıq fəaliyyəti üçün əsas var. Bunun üçün NATO-nu asılılıq üzərində deyil, tərəfdaşlıq üzərində qurulmuş, alyansın başlanğıc məqsədinə geri dönməsini təmin edən bir növ “NATO 3.0”-a çevirməliyik”, – Kolbi vurğulayıb.
Geri dön