Almaniyada bir kişi təxminən iki min il yaşı olan qədim Roma sikkələrindən ibarət xəzinə tapdıqdan sonra onu tam səkkiz il gizli saxlayıb. Qarabaginfo.az xəbər verir ki, hadisə barədə Live Science nəşri məlumat yayıb.

Məlumata görə, kişi 2017-ci ildə Aşağı Saksoniyada yerləşən Borsum kəndi yaxınlığında metal axtarıcı ilə gəzərkən sikkələri təsadüfən aşkar edib. O, icazəsiz axtarış apardığı üçün tapıntı barədə hakimiyyət orqanlarına xəbər verməyib və yalnız bu ilin yazında etiraf edib.

Oktyabr ayında arxeoloqlar həmin əraziyə gedərək əlavə qazıntı işləri aparıblar və daha çox artefakt tapıblar. Ümumilikdə təxminən 450 ədəd sikkə üzə çıxıb.

Alimlər hesab edir ki, bu tapıntı erkən Roma imperiyası dövrünə aid bölgədəki ən böyük xəzinələrdən biridir. Sikkələr eramızın I əsrinə — respublikanın süqutundan sonrakı illərə aiddir. Hazırda tədqiqatçılar xəzinənin həmin əraziyə necə düşdüyünü araşdırırlar.

Bildirilir ki, kişi indi arxeoloqlarla əməkdaşlıq edir və metal axtarışı üzrə rəsmi təlim keçib. O, indi xəzinə axtarışını qanuni şəkildə davam etdirə bilər. Hadisə ilə bağlı cinayət işi qaldırılmayıb, çünki tapıntının gizlədilməsi ilə bağlı müddət bitib.