Roma Papası XIV Leo Qəzzada davam edən müharibəni “vəhşilik” və “qeyri-müəyyən güc tətbiqi” adlandıraraq pisləyib.

Qarabaginfo.az “Guardian”a istinadən xəbər verir ki, bu açıqlama iyulun iyirmisində Qəzzanın şimalında israilli əsgərlərin ərzaq növbəsində dayanan insanlara atəş açması nəticəsində azı 93 fələstinlinin öldüyü bildirildikdən sonra səsləndirilib.

Fələstin tərəfinin məlumatına görə, BMT-nin ərzaq yardımı daşıyan yük maşınlarını gözləyən minlərlə insan Zikim keçid məntəqəsi yaxınlığında atəşə tutulub. Bu, son həftələr ərzində yardım axtaran mülki şəxslərin ən çox qətlə yetirildiyi hadisələrdən biri hesab olunur.

Eyni gündə Qəzzanın cənubundakı Rəfahda daha doqquz nəfər, Xan Yunisdə isə dörd nəfər oxşar şəraitdə öldürülüb. İsrail ordusu atəş açdıqlarını təsdiqləyib, lakin ölənlərin sayının Qəzza rəsmilərinin dediyindən az olduğunu iddia edir.

BMT-nin Ümumdünya Ərzaq Proqramı hadisəni “qəbuledilməz” adlandırıb və yardım axtaran mülki şəxslərin güllələnməsini qəti şəkildə pisləyib.

Papa XIV Leo Castel Gandolfoda dualar zamanı “bu vəhşiliyə dərhal son qoyulmalı və münaqişəyə sülh yolu ilə son verilməlidir” çağırışı edib.