Pezeşkian İsrailin hava zərbəsi zamanı yaralanıbmış

İran Prezidenti Məsud Pezeşkian ötən ay İsrailin hava zərbələri zamanı ayağından yaralanıb.

Qarabaginfo.az xəbər verir ki, bu barədə “Fars” agentliyi məlumat yayıb.

Mənbənin məlumatına görə, hadisə iyunun 16-da baş verib.

Həmin vaxt Tehrandakı binalardan birində İranın Ali Milli Təhlükəsizlik Şurasının iclası keçirilib. Elə bu vaxtda İsrail ordusu binanın giriş və çıxışlarına 6 ədəd raket zərbəsi endirib.

Zərbə zamanı binada elektrik enerjisi kəsilsə də, rəsmilər fövqəladə çıxış vasitəsilə oradan qaça biliblər. 

Agentlik əlavə edib ki, hücum nəticəsində iclas iştirakçılarının bəziləri, o cümlədən Prezident Pezeşkian təxliyə zamanı ayaqlarından yüngül xəsarət alıb.

Xatırladaq ki, Məsud Pezeşkian amerikalı jurnalist Taker Karlsona müsahibəsində İsrail hakimiyyətinin ona sui-qəsd təşkil etməyə cəhd etdiyini, lakin bunun uğursuz olduğunu açıqlayıb.

Onu da xatırladaq ki, İsraillə İran arasında münaqişə iyunun 13-dən 24-dək davam edib.