Tramp "dayan", Lavrov "davam" dedi

Rusiyanın xarici işlər naziri Sergey Lavrov ABŞ Prezidenti Donald Trampın Vladimir Putinə çağırışına münasibət bildirib.

Qarabaginfo.az xəbər verir ki, bu barədə o, Amerikanın CBS teleşirkətinə müsahibəsində danışıb.

Aprelin 24-nə keçən gecə Rusiya ordusu dron və raketlərdən istifadə etməklə Ukrayna paytaxtına hücum edib, 12 dinc sakin həlak olub, 90-dan çoxu yaralanıb. Tramp hücumdan sonra özünün "Truth" sosial səhifəsində yazıb: "Buna ehtiyac yoxdur. Vladimir, dayan. Rusiyanın Kiyevə endirdiyi zərbələrdən narazıyam. Hər həftə 5000 əsgər ölür. Gəlin sülh sazişi imzalayaq".

CBS jurnalisti Lavrovdan Moskvanın Trampın çağırışlarına əməl etməyə hazır olub-olmadığını soruşub.

“Biz Ukrayna ordusunun istifadə etdiyi obyektlərə, başqa ölkələrdən olan bəzi muzdlulara və təlimatçılara zərbələr endirməyə davam edəcəyik”, - Lavrov bildirib.

Kiyevə zərbənin səhv olub-olmaması ilə bağlı birbaşa suala cavab olaraq Lavrov deyib: “Bu, Ukrayna hərbçilərinin, Müdafiə Nazirliyinin istifadə etdiyi hədəf idi, döyüş meydanındakı komandirlərin onlara hücum etmək hüququ var”.