Azərbaycanda demoqrafik böhran - Doğum sayı azalıb, abortlar çoxalır

Azərbaycanda doğum göstəricisi rekord səviyyədə azalıb. Belə ki, bu ilin yanvar-fevral aylarında cəmi 15 971 körpə doğulub. Əhalinin hər 1000 nəfərinə düşən doğum sayı 10,2-dən 9,7-yə enib.

Bu, ölkə tarixində qeydə alınmış ən aşağı doğum səviyyəsidir. Əvvəllər bu göstərici yalnız 1943-cü ildə və ötən il bu qədər aşağı olub. Ötən ilin eyni dövründə doğulan uşaqların sayı 17 081 olmuşdu. Əgər 2023-cü ildə ölkədə 112 min 620 uşaq doğulmuşdusa, 2024 -cü ildə 102 min 310 uşaq doğulub. Müqayisə üçün qeyd edək ki, 1960-cı ildə hər 1000 nəfərə 42,6 körpə düşürdü.

Qarabaginfo.az-ın Dövlət Statistika Komitəsindən əldə etdiyi məlumata görə son illərdə ölkəmizdə perinatal ölümlərin və qadın xəstəlikləri arasında sonsuzluğun sayı artıb.

Son statistikalar göstərir ki, 2023-cü ildə hamiləlik dövründə ölən uşaqların sayı 1837 olub, bu göstərici 2020-ci ildə 996 idi. Onu da qeyd edək ki, son 10 ildə hər il ortalama 580 uşaq ölü doğulur, bundan başqa 7 günədək ömür sürən körpələrin sayında da kəskin artım müşahidə olunur. Belə ki, 2020-ci ildə 7 günədək ömür sürən uşaqların sayı 477 idisə, 2023-cü ildə bu rəqəm 1306-a yüksəlib. 

Qadınlar arasında abortların sayında da kəskin artım müşahidə edilir.

Ölü doğulanlarla birlikdə 2023-cü ildə doğuşların sayı 111 min 800, abortların sayı isə 73 min 800 olub. 10 il əvvəlki – 2015-ci ildəki göstəricilərdə isə doğuş sayı 164 min 600, abortların ümumi sayı isə 10 min 300 olub.

Statistikalar göstərir ki, abortların əksəriyyəti 25-34 yaş qrupundakı insanlara aiddir. 2023-cü ildə bu yaş kateqoriyasında olan ümumilikdə 106 min abort qeydə alınıb, bu rəqəm 2015-ci ildə 35 min 600 idi.

15-19 yaş qrupuna aid qadınların da abort etdirməsində artım müşahidə edilir. Belə ki, 19 yaşadək olan qadınlar arasında abort 2020-ci illə müqayisədə 3 min 300 artaraq 7 min 500-ə yüksəlib.

İlk hamiləlikdə abort həm tibbi, həm psixoloji, həm də sosial baxımdan ciddi mənfi nəticələrə yol açdığı üçün həkimlər birinci hamiləliyin pozulmasını tövsiyə etmirlər. Son statistikalar isə göstərir ki, il ərzində ilk hamiləlik zamanı abort etdirənlərin sayı 2 min 200 olub, müqayisə üçün qeyd edək ki, bu rəqəm 2020-ci ildə 800, 2022-ci ildə 1 700 olub.