Şahin Babayev: “Onlayn Azərbaycan” layihəsi uğurla tamamlanıb

"Onlayn Azərbaycan" layihəsi uğurla tamamlanıb və bu, Azərbaycanın rəqəmsal transformasiya yolunda atdığı ən vacib addımlardan biri olub".

Qarabaginfo.az xəbər verir ki, bunu “”Onlayn Azərbaycan” Rəqəmsallaşmada yeni mərhələ” adlı tədbirdə Azərbaycan Nəqliyyat və Kommunikasiya Holdinqinin icraçı direktoru Şahin Babayev deyib.

O qeyd edib ki, “Onlayn Azərbaycan"ın hədəfi, məktəblər daxil olmaqla, ölkədə hər kəsin internetə və rəqəmsal texnologiyalara çıxışını təmin etmək olub.

“BMT-nin hesablamalarına görə, dünyanın 3,7 milyard insanının internetə çıxışı yoxdur. Bu, dünya əhalisinin üçdə bir hissəsi deməkdir. BMT-nin qlobal rəqəmsal saziş təşəbbüsü hər kəsi 2030-cu ilə qədər internet bağlantısı ilə təmin etməyi hədəfləyir", - deyə Ş.Babayev bildirib.

Ş.Babayev qeyd edib ki, “Onlayn Azərbaycan" layihəsi ölkənin bütün ərazilərində həm biznes, həm də təsərrüfatların müasir texnologiyalar vasitəsilə yüksək sürətli, sabit, genişzolaqlı internetlə təmin olunmasını hədəfləyib:

“Bir çox tərəfdaşların birgə səyi nəticəsində ölkədə genişzolaqlı internet şəbəkəsinin qurulmasına nail olunub. Təbii ki, bu prosesdə müəyyən çətinliklərimiz olub. Layihə mərhələli şəkildə icra edilib və strateji əhəmiyyətə malik olub”.

Ş.Babayev vurğulayıb ki, son 4 il ərzində Azərbaycanda sabit, genişzolaqlı, yüksək sürətli internetə çıxış imkanı yaradılmış təsərrüfatların sayı 13 dəfə artaraq təxminən 3 milyona çatıb: "Nəticədə ölkənin sabit, genişzolaqlı internetlə əhatəsi tam təmin olunub. Bu uğurlar göstərir ki, layihə yalnız internet infrastrukturunu yaxşılaşdırmayıb, həm də ölkənin rəqəmsal gələcəyini formalaşdıran strateji addımlardan biri olub".