BP-nin baş icraçı direktoru İSTEFA VERDİ

BP Qrupunun baş icraçı direktoru Bernard Luni vəzifəsindən istefa verib.

 

Qarabaqinfo.az xəbər verir ki, bu barədə "Reuters" agentliyi məlumat yayıb.

 

Bildirilib ki, şirkətin baş maliyyə direktoru Mari Oçinkloss müvəqqəti olaraq baş icraçı direktorun səlahiyyətlərini yerinə yetirəcək.

 

Qeyd edək ki, 53 yaşlı Luni 2020-ci ilin fevralında 114 yaşlı BP şirkətini yenidən kəşf etmək vədi ilə baş direktor olub. O, Britaniyanın bu enerji nəhəngi üçün 2050-ci ilə qədər sıfır xalis emissiyaya nail olmaq və bərpa olunan, aşağı karbonlu enerjiyə milyardlarla sərmayə qoymaq üçün iddialı planlar hazırlayıb.

 

Luninin sürpriz istefası onun şirkətdəki həmkarları ilə şəxsi münasibətlərinə dair iddiaların ortaya çıxmasından sonra baş verib və bununla bağlı araşdırmaya aparıldığı bildirilir. “Financial Times” nəşri Luninin istefası barədə məlumat verməzdən əvvəl BP-nin Londondakı səhmləri 1 faiz bahalaşıb. Lakin istefa xəbərindən sonra şirkətin Nyu-Yorkda siyahıya alınmış səhmləri 1,5 faiz azalaraq günün ən aşağı səviyyəsinə enib.