“Mən də xaricdən gələndə dərman gətirmək istəyirəm” - Deputat

“Son zamanlarda ölkəmizdə bəzi dərman vasitələrinin tapılmaması halları artıb”.

Qarabaginfo.az xəbər verir ki, bunu Milli Məclisin bu gün keçirilən iclasında çıxışı zamanı deputat Rəşad Mahmudov bildirib. 

Millət vəkilinin sözlərinə görə, bu, həm pasiyentlər, həm də həkimlər üçün çətinliklər yaradır: “Ölkədə xəstələrin müalicəsi üçün lazım olan dərman preparatlarının çatışmazlığı var. Problemin həlli üçün əvvəla səbəbləri dəqiqləşdirmək lazımdır. Görünən 3 səbəb var. Bunlardan ikisi beynəlxalq səbəblər, biri isə ölkədaxili məsələdir. Hər kəs problemin ciddiliyini anlayır, amma problem öz həllini tapmır. 

Pandemiyanın dünya iqtisadiyyatı üçün yaratmış olduğu sıxıntılar bu gün də hiss olunur. Dünya iqtisadiyyatında istehsal azalıb, logistika xərcləri çox artıb. Beləliklə, dünyada qiymət artımı baş verib və əlçatanlıq çətinləşib. Digər səbəb isə Ukrayna-Rusiya müharibəsi də bu ölkələrdən dərman idxalına mane olur. Bu gün dərman qiymətləri gün keçdikcə yüksəlməkdədir. Ölkəmizdə dərmanların keyfiyyətini və kəmiyyətini tənzimləyəcək qurumlar Tarif Şurası və Səhiyyə Nazirliyidir. Bu gün dünyada gedən reallığa cavab verən mexanizm ölkəmizdə yoxdur. Ölkədə həyata keçirilən səhiyyə islahatları dərmanlarla bağlı yeni mexanizm yaradılmasını zəruri edir”.

***

Məsələyə deputat Razı Nurullayev də münasibət bildirib. O qeyd edib ki, bu gün ölkədə bütün sahələrdə bahalıq davam edir: "Əhalinin sosial vəziyyətinin yaxşılaşdırılması üçün hökumət tərəfindən addımlar atılır, Parlament tərəfindən qanunlar qəbul edilir. Amma, yenə də bahalaşma fonunda atılan addımlar geridə qalır. Elə məhsullar var ki, onlar vətəndaşlar üçün zəruridir və gərək o məhsulların vətəndaşlar tərəfindən şəxsi istifadəsi üçün gətirilməsinə problemlər yaradılmasın”.  

O qeyd edib ki, ölkədən xaricə səyahət edənlər geri dönəndə özləri ilə ehtiyacları olan dərman preparatları alıb gətirir: “Quru sərhədləri bağlıdır, yalnız hava yolu ilə mümkündür. Niyə bir vətəndaş bir qutudan artıq dərman gətirə bilməz? Vətəndaşın ömürlük, yaxud 3 aylıq, bir illik atacağı dərmanlar var. O vətəndaş digər ölkələrdən gələndə bir neçə aylıq dərmanını alır və zənnimcə düz edir. Nəinki, düz edir, vacib olanı edir. Bunu mən də etmək istəyirəm. Çünki, vətəndaşın xaricdən alıb gətirdiyi dərman bizim apteklərdə bəzən 5-7 dəfə baha olur. Şəxsən, mən xarici ölkəyə gedəndə elə qohum-əqrabamın məndən xahiş etdiyi dərman bir zənbil olur. O insanları tanıyıram ki, xəstədir, o dərmanlara ehtiyacı var, baha olduğuna görə çatdırıb ala bilmir. Heç zaman bir qutudan artıq dərman almamışam, çünki, narahat olmuşam ki, hava limanında üzümə söz gələr”. 

Razı Nurullayev vurğulayıb ki, insanlar qiymətin bahalığına görə o dərmanları ala bilmir, bir neçə il ömrü qısalır: “Bu, ürəkağrıdıcı mənzərədir”.