Rusiya Ukrayna limanlarında taxıl daşıyan gəmiləri buraxmağa hazır olduğunu deyib

Rusiya Ukrayna taxılını daşıyan yük gəmilərini limanlardan buraxmağa hazırdır.

Qarabaginfo.az “RİA Novosti“yə istinadən xəbər verir ki, bu barədə Rusiya Federasiyasının BMT-dəki daimi nümayəndəsi Vasili Nebenzya bildirib.

Nebenza gəmiləri buraxmaq üçün şərtləri açıqlayıb.

“Ukraynalılara gəlincə, qoy əvvəlcə limanlarını təmizləsinlər. Biz təhlükəsiz keçidi təmin etməyə hazırıq, lakin ilk növbədə onlar minaları təmizləməlidirlər. O minalar bizim deyil, onlarındır”, - deyə Nebenzya bildirib.

Jurnalistlərin BMT, Ukrayna, Türkiyə və Rusiya nümayəndələrinin taxıl ixracı ilə bağlı mümkün görüşü barədə sualına Nebenzya cavab verib ki, bu məlumatın nə dərəcədə doğru olduğunu bilmir.

O əlavə edib ki, indi bu mövzu ilə bağlı çoxlu spekulyasiyalar var.

BMT-nin məlumatına görə, Rusiyanın Ukraynada başlatdığı hərbi əməliyyatlar səbəbindən Ukraynanın dəniz limanlarında təxminən 25 milyon ton taxıl ixrac üçün qalıb.

Xatırladaq ki, mayın sonunda BMT-nin baş katibi Antonio Quterreş dünyada 10 həftəlik buğda ehtiyatının qaldığını bildirmişdi. Müddəti bitdikdən sonra planetdə təxminən 400 milyon insan aclıqla üzləşəcək.