Səbinə Əliyeva İƏT Ombudsmanlar Assosiasiyasının iclasına qatılıb

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva İslam Əməkdaşlıq Təşkilatının Ombudsmanlar Assosiasiyasının idarə heyətinin videokonfrans formatında keçirilən 6-ci iclasında iştirak edib.

Ombudsman Aparatının Mətbuat xidmətindən Qarabaginfo.az-a verilən xəbərə görə, Azərbaycan, Türkiyə, Pakistan, İran, Mərakeş və Cubiti Ombudsmanlarının iştirak etdiyi iclasda Assosiasiyanın ötənilki fəaliyyətinin nəticələrinin qiymətləndirilməsi ilə yanaşı eyni zamanda gələcək fəaliyyət istiqamətləri ilə bağlı müzakirələr aparılıb. Qeyd edilib ki, Assosiasiyanın təşkilatçılığı ilə üzv qurumların əməkdaşları üçün keçirilən insan hüquqları sahəsində maarifləndirmə tədbirləri yeni bilik və bacarıqlara yiyələnmək baxımından olduqca faydalı olmuşdur.

Tədbirdə çıxış edən Ombudsman Səbinə Əliyeva Assosiasiyaya yeni üzvlərin qəbulu prosesinin sürətləndirilməsi ilə bağlı fikirlərini bölüşmüş, iqtisadi və sosial hüquqların, informasiya əldə etmək hüququnun, əlilliyi olan şəxslərin hüquqlarının müdafiəsi sahəsində təcrübə mübadiləsinə əsaslanan hüquqi maarifləndirmə təlimlərinin keçirilməsinin əhəmiyyətini qeyd edib.

İclas Assosiasiyanın fəaliyyət planının müzakirəsi, idarə heyətinin növbəti iclasının və ümumi yığıncağının keçirilmə yeri, vaxtı və gündəliyinin müzakirəsi istiqamətində işini davam etdirib.