Azərbaycan Xarici İşlər Nazirliyinin (XİN) İşlər idarəsinin sabiq müdiri Fərhad Mollazadə və İşlər idarəsinin Təsərrüfat şöbəsinin müdiri Səlim Əlizadənin cinayət işi üzrə məhkəmə iclası keçirilib.

Qarabaginfo.az xəbər verir ki, Bakı Ağır Cinayətlər Məhkəməsinin hakimi Əfqan Hacıyevin sədrliyi ilə baş tutan prosesdə şahidlər dindirilib.

Şahid qismində ifadə verən şahid Azər Əliyev bildirib ki, çap işi ilə məşğul olub və bir neçə nazirliklə bu işlə bağlı əməkdaşlıq edib: "A dizayner" və "M dizayn" şirkətlərinə rəhbərlik etmişəm. Xarici İşlər Nazirliyi ilə müqavilə əsasında işləyirdik. Tenderlər keçirilib və bir neçə tenderin qalibi olmuşuq. 2011 və 2014-cü illərdə keçirilən ümumilikdə 456 min manatlıq tenderlərin və 2015-2017-ci illərdə keçirilən 512 manatlıq tenderin qalibi olmuşuq. Pulun hamısına məhsul almışıq. Mən Səlim Əlizadə və Fərhad Mollazadəni elə nazirlikdən tanıyıram. Şirkətimi tenderdə qalib etməsinə görə Səlimə Əlizadəyə 61 min manat vermişəm. Müqaviləni nazirliyin İşlər İdarəsinin müdiri ilə bağlamışdım".

Daha sonra şahid qismində Aleksandr Qriqoriyeviç dindirilib. O deyib ki, XİN-lə 5 il əməkdaşlıq edib: "Kartriclərin doldurulması və təmiri ilə məşğul idim. Bizim aramızda müqavilə olmadığından məvacibi nağd şəklində alırdım. Mənə pulu Səlim Əlizadə verirdi".

Digər şahid Ələkbərov Nicat isə deyib ki onun xəbəri olmadan şirkət təsis edilib və Rövşən adlı şəxs həmin müəssisənin adından pul çəkib: "Mən taksi sürücüsü işləyirəm. İstintaqa çağırdılar və onda bildim ki, adıma 4-5 şirkət açılıb".

Proses oktyabrın 13-də davam edəcək.

Xatırladaq ki, XİN-in sabiq işçiləri Dövlət Təhlükəsizliyi Xidməti (DTX) tərəfindən aparılan cinayət işi üzrə saxlanılıblar. Keçirilən əməliyyat nəticəsində XİN-in İşlər idarəsinin müdiri, Nazirliyin Tender Komissiyasının sədri Fərhad Mollazadə, İşlər idarəsinin Təsərrüfat şöbəsinin müdiri Səlim Əlizadə tərəfindən çoxsaylı qanunsuz əməllərə yol vermələrinə əsaslı şübhələr müəyyən edilərək həbs olunublar.

26 dekabr 2020-ci ildə hər iki şəxs barəsində həbs qətimkan tədbiri ləğv olunub və onlar ev dustaqlığına buraxılıblar.