Kəlbəcərin Çərəktar kəndində miskin durumlu, 8 uşaqlı bircə erməni ailə yaşayır...-VİDEO

 

 

Xəbər verdiyimiz kimi, Ermənistanın News.am saytının müxbiri  4 nəfər erməni ilə bərabər  Gorus-Laçın-Şuşa-Xankəndi yoluyla sərbəst şəkildə  hərəkət edərək Xocavənddəki Amaras məbədini  də ziyarət edib  Kəlbəcər rayonunun Çərəktar və Bağlıpəyə kəndlərinədək gedib çıxıb.  Müxbir səyahətlərindən bəhs edən video yayımlayıb. Videodan bəlli olur ki, Laçın rayonunun  Zabux kəndindəki 1 nömrəli postdakı Rusiya hərbçiləri  yalnız “Biz 5 nəfərik,  Stepanakertə - evimizə gedirik” deyən sürücünün sənədinə ötəri, gözucu baxmaqla “sağ olun” deyib avtomobili irəli –Azərbaycan torpaqlarına buraxır(bax://moderator.az/qarabagh/395577/rusiya-herbcileri-lacinda-qarabaa-geden-ermeni-masinlarini-bele-deqiq-yoxlayir-video/ ).

 

Moderator.az  bu dəfə həmin videonun şərhinin ardını təqdim edir.

 

... Xankəndinin küçələri, evlərin çoxu bərbad vəziyyətdədir. Qaşqabaqlı erməni qadın və kişiləri görünür... 

 

Erməni müxbir və yoldaşları Xankəndindən  Şuşikənd –Qırmızı bazar yolu ilə Xocavənd rayonunun Sos kəndi ərazisindəki Amaras məbədinə tərəf yollanırlar. Xankəndinin Şuşikənd  istiqamətindəki çıxışında, yolun sağında Putinin “2020-ci ilin adamı” kimi təqdim edildiyi böyük tablo görünür.  Yolboyu kəndlərdə miskin durumdakı ermənilər gözə çarpır. 

Xocalı rayonunun Dağyurd(“Saruşen”) kəndindəki  qoca ermənilər hər tərəfdən Azərbaycan postlarıyla əhatə olunduqlarından şikayətlənirlər... 

 

Qarşısında Rusiya hərbçilərinin postu olan Amaras məbədini də rahat ziyarət etdikdən sonra erməni səyahətçilər Xocavənd rayon mərkəzinə yollanırlar. Şəhərin girişində terrorçu Monte Melkonyanın böyük tablosu görünür...

 

Daha sonra onlar Kəlbəcər rayonunun Rusiya hərbçilərinin nəzarətində olan kəndlərinə tərəfə gedirlər.  Yayıcı kəndi yaxınlığındakı Ermənistanın  “Beyz Metalz” şirkətinin mis, molibden və s. istehsal edən Kaşen dağ-mədən müəssisəsinin böyük binalarının yanından keçirlər... 

 

Son məntəqələri Kəlbəcər rayonunun əvvəllər yalnız Azərbaycan türklərinin yaşadığı Çərəktar kəndi olur. Məlum olur ki, bu kənddə çox miskin durumda 8 uşaqlı  yalnız bir erməni ailəsi yaşayır... Erməni qadın vəziyyətlərindən doyunca şikayətlənir...

“Çərəktarda dayanırıq, digər tərəfdə artıq  Azərbaycan postu var. Kənddə tək bir ailə üçün Azərbaycan postlarıyla üzbəüz,  hərbçilərin  böyük video-kameralarının daimi nəzarəti altında yaşamaq asan deyil...  Kiçiklərinin 4 yaşı olan ailə dağın ətəyində Azərbaycan əsgərləri ilə eyni mənbədən su götürür... Kənddə nə  başqa bir sakin, nə məktəb, nə də mağaza var”- erməni müxbir belə yazır.

 

Sonda ermənilər irəli getsələr də, “Nor-Erkec” yazılmış göstəricidən sonra irəlidə Azəbaycan əsgərlərini və bayrağını görüb geri qayıdırlar... “Nor-Erkec” əslində Kəlbəcərin işğaldan azad edilmiş Bağlıpəyə kəndidir...

 

Xatırladaq ki,  10 noyabr razılaşmasına əsasən Kəlbəcər rayonunun Azərbaycana təhvil verilməsi ilə bağlı qərar verildikdən sonra ermənilər  Çərəktar kəndinin də əldən çıxacağını zənn edərək evlərini yandırıb oranı tərk ediblər. Lakin  sonradan kəndin “rəhbəri” deyib ki, sözügedən kənd və Umudlu kəndi ermənilərin nəzarətində qalacaq. Kənd sakinləri bundan son anda, yəni artıq evləri yandırıb çıxdıqdan sonra xəbər tutublar və şoka düşüblər... 

 

Hazırda separatçı rejim kənddəki evləri aylardır bərpa etməyə çalışsa da, maliyyə yoxluğu ucbatından işləri tamam yarımçıq qalıb...