Rusiyada deputat azərbaycanlı gənci güllələyən polisə haqq qazandırıb və nəticədə Daxili İşlər Nazirliyinin ekstremizmə qarşı regional mübarizə idarəsinə (“E” idarəsi) çağırılaraq dörd saat dindirilib.
Qarabaginfo.az xəbər verir ki, Novosibirsk şəhər dumasının deputatı Rostislav Antonov 19 yaşlı azərbaycanlı Vəkil Abdullayevi xidməti silahlı ilə güllələyib öldürən polis zabitinin günahsız olduğunu iddia etdiyi və gəncin öldürülməsinə görə etiraz aksiyası keçirənlərin məsuliyyətə cəlb olunmasına çağırdığı üçün ona “E” idarəsindən zəng vurduqlarını bildirib.
Rusiyada daha bir siyasətçi-yerli dumanın deputatı Antonov azərbaycanlılara qarşı nifrətini büruzə verib...
“Bu gün sosial şəbəkədə dərc etdiyim informasiyadan sonra məni ekstremizə qarşı mübarizə Mərkəzinə çağırdılar- ora gedəndə düşünürdüm ki, yəqin mənim ərizəmə görə çağırıblar, amma mənim haqqımda verilmiş ərizəyə görə dindirdilər”,-deputat deyib.
Antonovun bildirdiyinə görə, ona deyiblər ki, hansısa yalan iddialarıma görə barəmdə yoxlama aparılır. “Orada dörd saat saxladılar”,-deputat “Gazeta.ru”-ya bildirib.
Mayın 31-dəö Novosibirskin mərkəzində azərbaycanlılar Vəkil Abdullayevin öldürülməsinə etiraz olaraq mitinq təşkil ediblər. Antonov isə ekstremizmə qarşı mübarizə Mərkəzinə deputat sorğusu göndərərək bu mitinqin qanuniliyini araşdırmağa çağırıb.
“Novosibirskin mərkəzində icazəsiz mitinq keçirilir, bizə burada tək adamlıq piket də qadağandır, amma belə çıxır ki, bir qrup adam toplaşıb polisə müqavimət göstərən şəxsi müdafiə edir, hansısa tələblər irəli sürür. Üstəlik polisin ailəsinə təhdidlər, daxili işlər şöbəsinə diasporun nümayəndə heyətinin göndərilməsi...Mən bütün bunları bir sənəddə topladım və orqanlara göndərdim”,-Antonov izah edib.
Bildirilir ki, iyunun 1-də Novosibirskdəki azərbaycanlılar diasporunun rəhbəri Rasim Sahib oğlu Babayev deputat Antonovla əlaqə saxlayıb, onun ekstremist mövqeyinə etirazını bildirib. Antonov isə iyunun 2-də Novosibirsk meriyasına məktub göndərərək azərbaycanlı diasporu lideri ilə münaqişə barədə çatdırıb və Babayevlə beynəlxalq münasibətlər üzrə koordinasiya şurası çərçivəsində debat təşkil etməyi istəyib. “Mən onun bəzi sözlərini təzyiq və gizli təhdid kimi qəbul etdim”,-deputat bildirib.
Diaspor lideri Babayev deputata deyib ki, onun açıqlamalarından ekstremizm iyi gəlir...
Sahib Babayev isə deputatla söhbəti barədə şərh vermək istəməyib.
Xatırladaq ki, artıq siyasi qalmaqala səbəb olmuş bu faciə mayın 28-də Novosibirksin Moşkovsk rayonunda baş verib. Yol patrul polisi ekipajı qabaq yan şüşələri tündləşdirilmiş avtomobil görüb və onu saxlamaq istəyib. Sürücü avtomobili saxlamayıb və sürəti artırıb. Polislər onu təqib ediblər və avtomobil bir qədər gedəndən sonra dayanıb. İçərisindən üç nəfər düşüb, polislər onlardan ikisini tutublar, üçüncü şəxs baş verənlərii telefonla çəkməyə başlayıb. Polis əməkdaşı Aleksandr Qusev bu zaman tabel silahını hazır vəziyyətə gətirib və 19 yaşlı Vəkil Abdullayevin başından atəş açıb. Yaralı gənc xəstəxanaya aparılsa da mayın 30-da keçinib.
Qusev saxlanılıb və barəsində ehtiyatsızlıqdan adam öldürmə, xidməti səlahiyyətlərini aşma maddələri ilə cinayət işi qaldırılıb. Rusiya İstintaq Komitəsinin ilkin versiyasına görə, "göstərilən müqaviməti dəf edərkən, polis əməkdaşı öz səlahiyyətlərindən kənara çıxaraq 19 yaşlı oğlana qarşı zorakılıqdan istifadə edib, zərərçəkənə əlləri və ayaqları ilə zərbələr vurub. Sonra o, PM markalı tabel silahını koburdan çıxararaq onu döyüş vəziyyətinə gətirib və qurbanına tərəf yönəldib. Və hansısa məqamda polis qeyri-ixtiyari tapançanın tətiyini çəkib, nəticədə zərərçəkən başından güllə yarası alıb”.
Novosibirskdə yaşayan azərbaycanlılar isə gəncin öldürülməsinə etiraz olaraq avtoyürüş təşkil ediblər. Məsələ ilə bağlı Azərbaycanın Rusiyadakı səfirliyi və Azərbaycan Baş prokurorluğu Rusiya tərəfinə sorğular göndərib.
Bu hadisə Rusiyada bəzi siyasətçilərin azərbaycanlılara qarşı nifrət dolu çıxışlarına da səbəb olub. Belə ki, şəhər deputatı Antonovdan əvvəl “Russia Today”in müxbiri, Rusiya Federasiyası İctimai Palatasının üzvü, Dövlət Dumasının "Yedinaya Rossiya" dan deputatlığa namizəd Mariya Butina azərbaycanlı gənci öldürən polisin nəinki məsuliyyətdən azad edilməli olduğunu bildirib, üstəlik ona mükafat verilməsini təklif edib.
"Başqa yol yoxdur", - deyə o əminliklə bildirib. Mariya Butinə ABŞ-da işləmiş keçmiş casusdur, həbs olunub və FTB müstəntiqləri ilə əməkdaşlığa gedərək il yarımdan sonra azadlığa çıxıb. İndi Marqarita Simonyanın yanında işləyən bu casus-siyasətçi Novosibirskdə baş vermiş faciəni fürsət bilərək azərbaycanlılara qarşı nifrətini büruzə verir...
(virtualaz.org)