Bu günlərdə TEAS Press Nəşriyyat evində nəşrə hazırlanaraq Türkiyədə çap edilən kitab elə belə də adlanır: “Xarıbülbülün nağılı”. Lap əvvəldə bildirilir ki, kitab Qarabağ müharibəsində, torpaqlarımızın azadlığı uğrunda şəhid olmuş qəhrəmanlarımıza ithaf olunur.
TEAS Press Nəşriyyat evinin Nəşriyyat məhsullarının istehsalı və SMM üzrə meneceri Rəşad İsmixanlının Qarabaginfo.az-a verdiyi məlumata görə Azərbaycan Respublikası Dağlıq Qarabağ Bölgəsinin Azərbaycanlı İcması (bu yaxınlarda adı dəyişdirilmiş və hazırda “Qarabağa dönüş” adlanır) İctimai Birliyinin Beynəlxalq əlaqələr şöbəsinin müdiri Aybəniz İsmayılovanın müəllif olduğu kitabda Şuşanın rəmzi sayılan və 44 günlük Vətən müharibəsindən sonra qələbəmizin rəmzinə çevrilən Xarıbülbülün əfsanəsi yenidən canlandırılmış, Vətən müharibəsilə əlaqələndirilmişdir. İllüstrasiyaların müəllifi isə Aida Əmirovadır.
– Yüz illərdir ki, nəsillərdən-nəsillərə keçən əfsanələrdə Xarıbülbül sevgi, dostluq uğrunda fədakarlığın nümunəsi kimi tərənnüm olunur, – deyə İsmixanlı qeyd edib. – Bu gün isə Xarıbülbül Şuşanın, Qarabağın, bütün Azərbaycan torpaqlarının işğaldan azad olunması üçün canını fəda edən qəhrəman şəhidlərimizin anım simvoludur. Xarıbülbül Vətənə sevginin, doğma torpaq uğrunda mübarizənin, qəhrəmanlığın rəmzi kimi yaddaşlarda yaşayır. Bu nağıl sevgini, dostluğu, Vətəni uca tutanların fədakarlığı haqqındadır.
Ümid edirik ki, uşaqlar illüstrasiyalarla zəngin “Xarıbülbülün nağılı”nı böyük maraq və həvəslə oxuyacaqlar və bu kitab onlara ülvi duyğular, vətənpərvərlik ruhu aşılayacaq.
“Azad Şuşa”nın oxucularına bildirmək istəyirəm ki, “Xarıbülbülün nağılı”nı əldə etmək üçün bütün kitab mağazalarına yaxınlaşa və ya bu nömrə ilə əlaqə saxlaya bilərlər: (+994) 50 290 49 03. (Azad Şuşa)