Bu gün Əli Əsədov Ərdoğanla görüşəcək

Baş nazir Əli Əsədov və onun rəhbərlik etdiyi nümayəndə heyəti Türkiyənin vitse-prezidenti Fuad Oktayın dəvəti ilə Türkiyədə səfərdədir.

Qarabaginfo.az xəbər verir ki, səfər çərçivəsində Əli Əsədov və Fuad Oktay Türkiyənin Xarici İqtisadi Əlaqələr Qurumunun təşəbbüsü ilə keçiriləcək və iki ölkədən 150 özəl sektor nümayəndəsinin iştirak edəcəyi Türkiyə-Azərbaycan iş forumunun ümumi iclasında iştirak edəcəklər.

Türkiyə ticarət naziri Ruhsar Pekcan və Azərbaycanın iqtisadiyyat naziri Mikayıl Cabbarovun da iclasda iştirak edəcəyi gözlənilir.

Həmçinin Ə. Əsədov və F. Oktay sabah keçiriləcək Türkiyə-Azərbaycan İqtisadi Əməkdaşlıq Komissiyasının 9-cu iclasına da qatılacaqlar. Fuad Oktay, Əli Əsədov və nümayəndə heyətlərinin arasında danışıqlardan sonra Prezident sarayında iki ölkə arasında müqavilələrin imzalanması mərasimi keçiriləcək.

Türkiyə Prezident Administrasiyasının mənbələrindən alınan məlumata görə, Türkiyə və Azərbaycan arasında dövlət və özəl sektordakı ticarət razılaşmalarının 100 milyon dolların üzərində olması gözlənilir.