Avropanın bir sıra şəhərlərində Ermənistanın mina təhlükəsinə qarşı etiraz aksiyaları keçirilir - FOTO
Bu gün, 08:27. Yazar: Admin
Avropanın müxtəlif şəhərlərində Ermənistanın mina təhlükəsinə diqqət çəkmək məqsədilə silsilə aksiyalar təşkil olunur.
Qarabaginfo.az xəbər verir ki, bu barədə Qeyri-Hökumət Təşkilatlarına Dövlət Dəstəyi Agentliyi məlumat yayıb.
Bildirilib ki, Azərbaycanın “Gilavar Foto Klubu” İctimai Birliyi tərəfindən həyata keçirilən “Minasız dünya” beynəlxalq kampaniyası çərçivəsində oktyabrın 17-də İtaliyanın Milan şəhərində növbəti sərgi keçirilib.
Kampaniya çərçivəsində bundan əvvəl oktyabrın 5-də İsveçrənin Cenevrə, 7-də Çexiyanın Brno, 9-da Sloveniyanın Lyublyana, 11-də Bosniya və Herseqovinanın Sarayevo, 13-də Xorvatiyanın Zaqreb, 15-də Avstriyanın Zalsburq və 17-də İtaliyanın Roma şəhərlərində silsilə fotoekspozisiyalar təşkil olunub.
Aksiyalarda Ermənistanın işğal dövründə Azərbaycan ərazilərində basdırdığı minaların yaratdığı təhlükəyə diqqət çəkilib. Bildirilib ki, Azərbaycanla Ermənistan arasında münaqişə başa çatsa da, mina təhlükəsi mülki əhali üçün ciddi risk olaraq qalır.
Kampaniya Azərbaycan QHT Agentliyi və Qarabağ Dirçəliş Fondunun tərəfdaşlığı ilə həyata keçirilir.
Bundan başqa, “Qarabağ İtkin Ailələri” İctimai Birliyinin təşkilatçılığı ilə azərbaycanlı itkin düşmüş şəxslərin ailələri də Avropada Ermənistan əleyhinə etiraz aksiyalarına başlayıblar.
Oktyabrın 20-də Belçikanın paytaxtı Brüsseldə, Avropa Parlamentinin qarşısındakı “Schuman” meydanında bir qrup azərbaycanlı itkin ailəsi aksiya keçirib.
Aksiyada Birinci Qarabağ müharibəsi zamanı 4 010 azərbaycanlının itkin düşdüyü, onların arasında 71 uşaq, 288 qadın və 319 ahıl şəxsin olduğu diqqətə çatdırılıb.
Geri dön