Oktyabr ayında Moskva və digər böyük şəhərlərin sakinlərinin təsirini hiss etdiyi, Rusiyanın hava limanlarının fəaliyyətini iflic etməyə yönəlmiş Ukrayna əməliyyatı yaxın vaxtlarda daha güclü mərhələyə keçəcək.

Bu barədə planın hazırlanmasında birbaşa iştirak edən ukraynalı rəsmilər “The Atlantic” nəşrinə danışıblar.

İndiyədək Ukrayna hava limanlarının yaxınlığındakı hava məkanını uzaqmənzilli dronlarla dolduraraq uçuş-enmə zolaqlarının bağlanmasına səbəb olub, lakin aviasiya infrastrukturuna birbaşa zərbələr endirməyib. Buna baxmayaraq, bu taktika Moskva hava limanlarında ciddi xaos yaradıb.

Oktyabrın 3-dən 9-dək bir həftə ərzində 345 reys ləğv edilib, təxminən 4 min reys isə gecikib. Bəzi gecikmələr 10 saatdan çox davam edib.

Oktyabrın 10-da 692 reys gecikib, 93 reys ləğv olunub. Oktyabrın 14-də isə gecikən reyslərin sayı 238, ləğv edilənlərin sayı 124 olub.

Orta hesabla paytaxtın hava limanları hər gün təxminən üç saat fəaliyyətini dayandırıb. Oktyabrın 9-da, cümə günü, Vladimir Putinin Türkmənistandan Moskvaya qayıdan təyyarəsi də şəhərdə eniş edə bilməyib. Həmin vaxt hücum zamanı dörd hava limanından ikisi yeddi saat ərzində bütün reyslər üçün bağlanıb.

Ukrayna süni intellektlə idarə olunan dronlardan istifadə edə bilər

“The Atlantic” nəşrinin mənbələrinin bildirdiyinə görə, “M&Ms” adlandırılan əməliyyatın bu, yalnız başlanğıcıdır.

Daha genişmiqyaslı ssenari hava hücumundan müdafiə sistemlərindən yan keçə və hava limanlarına birbaşa zərbələr endirə bilən süni intellektlə idarə olunan dronlardan istifadəni nəzərdə tutur.

Mənbələr bildiriblər ki, yaxın vaxtlarda ABŞ kəşfiyyat məlumatlarına ehtiyac duymayan belə dronların kütləvi istehsalına başlanacaq.

Mənbələrdən birinin sözlərinə görə, bu tip dronlardan biri artıq Donbasda döyüş əməliyyatları zamanı istifadə edilib. Bununla belə, dronların hazırlanması prosesi hələ də davam edir.

Mənbə əlavə edib ki, bu pilotsuz uçuş aparatları indiyədək Rusiyanın hava limanlarına qarşı tətbiq edilməyib.

Trampın mövqeyi Ukraynanın seçimlərini çətinləşdirir

“The Atlantic” yazır ki, Donald Tramp Ukraynadan Rusiyanın neft emalı zavodlarına zərbələri dayandırmağı tələb etsə də, hava limanları və məlumat mərkəzlərinə hücumlarla bağlı belə bir tələb irəli sürməyib. Ukrayna Silahlı Qüvvələri ötən həftə həmin obyektləri də hədəfə alıb.

Nəşrin məlumatına görə, Tramp ötən ay Volodimir Zelenski ilə ilk telefon danışığı zamanı Kiyevə neft zavodlarından başqa obyektləri hədəf seçməyi də işarə edib.

“Başqa çoxlu hədəflər var”, – Tramp deyib.

“The Atlantic” hesab edir ki, ABŞ prezidenti getdikcə Rusiya ilə Ukrayna arasında vasitəçi roluna daha az maraq göstərir və Kremlin maraqlarına uyğun razılaşmanın əldə olunmasına çalışan şəxs roluna daha çox yaxınlaşır.

Bu vəziyyət Volodimir Zelenskini çətin seçim qarşısında qoyur: Rusiyanın şərtləri əsasında müharibənin başa çatması ilə bağlı Vladimir Putin və Donald Trampın tələblərini qəbul etmək, yaxud hətta ABŞ-nin dəstəyi olmadan mübarizəni davam etdirmək üçün yeni yollar tapmaq.