Makron: Fransa və ABŞ Hörmüz boğazında gəmiçiliyin bərpası üçün birgə çalışacaq

Fransa və ABŞ Hörmüz boğazında gəmiçiliyin təhlükəsizliyinin təmin edilməsi və enerji bazarlarında gərginliyin azaldılması üçün səylərini əlaqələndirəcəklər.

"Reuters" xəbər verir ki, bunu Fransa Prezidenti Emmanuel Makron Nyu-Yorkda ABŞ Prezidenti Donald Trampla görüşündən sonra bildirib.

“Enerji bazarlarında gərginliyi azaltmaq, Yaxın Şərqdə kritik infrastrukturu və Hörmüz boğazında gəmiçilik azadlığını qorumaq üçün birlikdə hərəkət etmək qərarına gəldik”, – Makron bildirib.

Hörmüz boğazında gəmi hərəkəti son həftələrdə kəskin azalıb. Reuters-in məlumatına görə, ötən həftəsonu boğazdan görünən rejimdə cəmi 17 yük gəmisi keçib.

Makron həmçinin tərəflərin Ukrayna və Rusiyanın enerji obyektlərinə zərbələrinə moratorium tətbiq edilməsi imkanını müzakirə etdiklərini açıqlayıb.