Zukerberq süni intellekt tərtibatçılarını öz modellərinin təhlükəsizliyinə görə məsuliyyət daşımağa çağırıb

“Meta”nın həmtəsisçisi Mark Zukerberq bütün süni intellekt sənayesinin inkişaf tempinin aşağı salınması əvəzinə, ayrı-ayrı tərtibatçıların öz modellərinin təhlükəsizliyini təmin etməsinin və risklərin qiymətləndirilməsinə müstəqil ekspertlərin cəlb olunmasının tərəfdarı olduğunu bildirib.

Qarabaginfo.az xəbər verir ki, bu barədə Zukerberq “X” hesabında yazıb.

“Hər bir tərtibatçı modellərin təhlükəsiz şəkildə öyrədilməsi üçün tələb olunan tempdə işləməyə və bunun üçün zəruri tədbirləri müstəqil şəkildə görməyə görə məsuliyyət daşıyır. Risklərin qiymətləndirilməsi üçün müstəqil ekspertlərin və məsləhətçilərin cəlb edilməsi sənayedə ən yaxşı təcrübələrdən biridir”, – o bildirib.

Zukerberqin sözlərinə görə, “Meta Superintelligence Labs” (MSL) artıq bir sıra istiqamətlərdə bu yanaşmadan istifadə edir və digər süni intellekt tərtibatçıları da eyni addımı ata bilərlər.

O qeyd edib ki, “Meta” daha əvvəl təhlükəsizlik səbəbindən “Muse” süni intellekt agentinin istifadəyə verilməsini bir neçə ay təxirə salıb. Bununla belə, şirkət digər tərtibatçılardan öz agentlərinin təqdimatını gecikdirməyi tələb etməyib.

“Biz sadəcə bunu etdik və məsələyə gündəlik iş öhdəliklərimizin bir hissəsi kimi yanaşdıq”, – Zukerberq vurğulayıb.