Qidalanma damar sağlamlığına birbaşa təsir göstərir və tromb əmələ gəlməsi riskinin azalmasına kömək edə bilər.

Dietoloq Oleq Şvets trombozun profilaktikası üçün faydalı hesab olunan altı qidanı açıqlayıb.

Zeytun yağı

Araşdırmalar göstərir ki, artıq çəkisi olan və həftədə ən azı bir dəfə zeytun yağı qəbul edən insanlarda tromb əmələ gəlməsində iştirak edən trombositlərin aktivliyi azalır. Xüsusilə soyuq sıxım (Extra Virgin Olive Oil – EVOO) zeytun yağı tərkibindəki fenollar sayəsində qanın laxtalanmasına müsbət təsir göstərə bilər. Bundan əlavə, zeytun yağı ürək üçün faydalı doymamış yağlarla zəngindir.

Zəncəfil

Zəncəfil təbii antikoaqulyant xüsusiyyətlərə malikdir və trombositlərin bir-birinə yapışmasının qarşısını almağa kömək edə bilər. Araşdırmalarda gündə 5 qram çiy zəncəfil qəbul edən qadınlarda tromb əmələ gəlməsi ilə bağlı göstəricilərin azaldığı müşahidə olunub. Zəncəfili çiy, qurudulmuş, bişmiş və ya rəndələnmiş halda yeməklərə əlavə etmək mümkündür.

Sarımsaq

Sarımsaq qanın laxtalanmasında iştirak edən tromboksan maddəsinin səviyyəsini azaldır. Laborator tədqiqatları onun trombositlərin yapışmasını zəiflətdiyini göstərir. Mütəxəssislər gündə bir diş sarımsağın damar sağlamlığı üçün faydalı ola biləcəyini bildirirlər.

Darçın

Darçının tərkibində qanın laxtalanmasını zəiflədə bilən kumarin maddəsi var. Tədqiqatlara görə, gündə 2-6 qram darçın qəbul edilməsi ürək-damar xəstəlikləri riskinin azalmasına kömək edə bilər. Darçını sıyıqlara, çaylara və digər içkilərə əlavə etmək mümkündür.

Kayen bibəri

Tərkibindəki kapsaisin maddəsi sayəsində kayen bibərinin qanı durulaşdırmağa kömək edə biləcəyi bildirilir. İnsanlar üzərində aparılan araşdırmalar məhdud olsa da, müntəzəm acı qida qəbulunun ümumi sağlamlığa müsbət təsir göstərə biləcəyi qeyd olunur.

Sarıkök

Sarıkökün əsas aktiv maddəsi olan kurkumin iltihabəleyhinə və antikoaqulyant xüsusiyyətlərə malikdir. Mütəxəssislər gündə 500 milliqramdan 2 qrama qədər zerdeçal qəbulunun faydalı ola biləcəyini bildirirlər. Onu şorbalara, tərəvəz yeməklərinə və düyüyə əlavə etmək olar.

Qəhvə və qırmızı şərab haqqında nə məlumdur?

Mütəxəssislərin fikrincə, qəhvənin tromb riskinə təsiri ilə bağlı nəticələr hələ də birmənalı deyil. Bəzi araşdırmalara görə, gündə 2-3 fincan qəhvə qəbulunun sağlam insanlar üçün təhlükəsiz olduğu hesab edilir.

Qırmızı şərabın tərkibindəki resveratrol kimi polifenolların tromb riskini azalda biləcəyi bildirilsə də, həddindən artıq alkoqol qəbulu əksinə, damar sisteminə zərər verərək tromboz riskini artırır.

Hansı qidalardan uzaq durmaq lazımdır?

Mütəxəssislər trans yağlarla zəngin şirniyyatların, sənaye üsulu ilə hazırlanmış xəmir məhsullarının və yağlı qırmızı ətin həddindən artıq istehlakını məhdudlaşdırmağı tövsiyə edirlər. Bununla yanaşı, müntəzəm fiziki aktivlik və uzun müddət hərəkətsiz qalmamaq da trombozun profilaktikasında mühüm rol oynayır.