Vuçiç Azərbaycan müdafiə nazirini qəbul edib

Azərbaycan Respublikasının müdafiə naziri general-polkovnik Zakir Həsənovun Serbiyaya rəsmi səfəri davam edir.

Müdafiə Nazirliyindən Qarabaginfo.az-a verilən xəbərə görə, səfər çərçivəsində Serbiya Respublikasının Prezidenti Aleksandar Vuçiç Azərbaycan nümayəndə heyətini qəbul edib.

Azərbaycan Respublikasının Serbiyadakı səfiri Kamil Xasiyevin də iştirak etdiyi görüşdə ölkələrimiz arasında hərbi əməkdaşlıq və müdafiə sənayesi sahəsində qarşılıqlı əlaqələrin inkişaf perspektivləri müzakirə edilib.

Görüşdən sonra müdafiə naziri Kruşevaç şəhərində yerləşən "Slobodişte" Memorial Kompleksini ziyarət edib, İkinci Dünya müharibəsi qurbanlarının xatirəsinə inşa edilmiş abidə önünə əklil dəstəsi qoyaraq dərin hörmət və ehtiramını bildirib.