ABŞ-da benzinin qiyməti bir gündə qallon üçün 4,18 dollara (litr üçün təxminən 1,10 dollar) yüksəlib. Bu da 2022-ci ilin avqust ayından bəri ən yüksək göstəricidir.
Qarabaginfo.az CNN-ə isinadən bildirir ki, bu barədə Amerika Avtomobil Assosiasiyasının məlumatında deyilir.
CNN xəbər verir ki, qiymət bir gündə təxminən 6 sent artıb, bu da son beş həftədə ən böyük bir günlük artımdır. Qeyd olunur ki, neft fyuçerslərinin qiymətlərinin artması amerikalılar üçün benzinin qiymətlərinin artmağa davam edəcəyini göstərir.
Ən yüksək qiymət Kaliforniyada qeydə alınıb və burada bir qallon benzinin qiyməti 5,96 dollara çatıb.
CNN xatırladır ki, ABŞ-da benzinin qiymətləri aprelin əvvəlində İranla münaqişədə atəşkəs elan edildikdən sonra iki həftə ərzində düşüb. Lakin danışıqların dayandırılması səbəbindən yanacaq qiymətləri yenidən artmağa başlayıb.
Amerika konsaltinq şirkəti Lipow Oil Associates-in proqnozuna görə, ölkə üzrə orta benzinin qiyməti növbəti həftə və ya 10 gün ərzində qallon üçün 4,30 dollara yüksələ bilər.