Avropa İttifaqı (Aİ) Rusiya Mərkəzi Bankının dondurulmuş aktivlərindən əldə olunan 1,4 milyard avro məbləğində faiz gəlirini Ukraynaya verəcək.
Bu vəsait 2025-ci ilin ikinci yarısında toplanıb.
Aktivlər Rusiyanın Ukraynaya qarşı müharibəsinə cavab olaraq Aİ-nin tətbiq etdiyi sanksiyalar çərçivəsində dondurulmuş olaraq qalır, lakin faizlər Rusiya tərəfinə məxsus deyil və Kiyevin dəstəklənməsi üçün istifadə oluna bilər.
Qeyd edək ki, 2022-ci il fevralın 24-də Rusiyanın Ukraynaya genişmiqyaslı müdaxiləsi ilə Rusiya-Ukrayna müharibəsi başlayıb və hazırda Rusiya Ukrayna ərazisinin təxminən 20 faizinə, o cümlədən Donetsk, Luqansk, Zaporojye və Xerson vilayətlərinin bir hissəsinə nəzarət edir. Bundan əvvəl 2014-cü ildə Rusiya Ukraynanın tərkibində olan Krımı ilhaq edib.