Rusiyanın Ukraynaya qarşı başlatdığı müharibə nəticəsində Mariupol şəhəri cəbhə xəttinə çevrilib. Hazırda mühasirədə olan şəhər Rusiyanın döyüş təyyarələri və ağır artilleriyası vasitəsilə hər gün bombalanır. Yaşayış məntəqələri də atəşə tutulduğundan, şəhər ətrafında hərəkət etmək təhlükəlidir.

Qarabaginfo.az xəbər verir ki, müharibədən əvvəl Mariupolun əhalisi 400.000 nəfərdən çox idi. 

Ukrayna Baş nazirinin müavini İrina Vereşçukun sözlərinə görə, martın 14-nə kimi mühasirədə olan şəhərdə 300 minə yaxın mülki şəxs hələ də qalıb. 14-15 mart tarixlərində isə 20.000-dən çox insan Mariupoldan təxliyə oluna bilib.

Liman şəhərinin işığı, suyu və qazı kəsilib. İki həftə əvvəl mühasirə başlayandan bəri şəhərin internet və mobil şəbəkələri də bağlanıb. Şəhərdən xəbərləri təsadüfi əlaqələrdən və Mariupolda qalan bir neçə beynəlxalq jurnalistdən əldə etmək mümkün olur.

Şəhərin mühasirədə olması, insanların ac, susuz qalması ilə nəticələnib. Bundan başqa, şəhər sakinləri soyuq havada zirzəmilərdə qalmağa məhkum olublar. Bu isə müxtəlif xəstəliklərin yayılması ilə nəticələnə bilər.

Ukraynanın xarici işlər naziri Dmitri Kuleba bildirib ki, Mariupolda dərman və qida çatışmazlığı olan 3000-ə yaxın yeni doğulmuş körpə var.

Yerli medianın yaydığı məlumata görə, Rusiya tərəfi dinc sakinləri Mariupoldan çıxarmaq və şəhərə yardım malları gətirmək üçün razılaşdırılmış atəşkəs rejimini davamlı olaraq pozub. Bu səbəbdən kritik ehtiyaclar daha da çoxalıb. Bir həftə əvvələ olan məlumata görə, ərzaq mağazalarında və apteklərdə ya anbarlar tükənib, ya da talan edilib.

Mariupol ilhaq edilmiş Krım yarımadası ilə Ukraynanın şərqinin Rusiya tərəfindən işğal olunmuş hissələri arasında Azov dənizi sahilində yerləşir. Bu səbəbdən şəhər Rusiya üçün strateji əhəmiyyət kəsb edir. Belə ki, ruslar Mariupolu ələ keçirib, iki ərazini birləşdirsə, Ukraynanın Azov dənizi ilə əlaqəsini də kəsmiş olacaq.(Qafqazinfo)